நாட்டின் பல மாகாணங்களில் இன்று பலத்த மழை!

இன்றைய தினம் (12 பெப்ரவரி 2026) நாட்டின் பல பகுதிகளில் மழையுடனான வானிலை மீண்டும் தீவிரமடையும் என வளிமண்டலவியல் திணைக்களம் முன்னறிவிப்பு விடுத்துள்ளது.

மத்திய, ஊவா, கிழக்கு மற்றும் வடமத்திய மாகாணங்களிலும் அம்பாந்தோட்டை மாவட்டத்திலும் அவ்வப்போது மழை பெய்யக்கூடும் என எதிர்பார்க்கப்படுகிறது. குறிப்பாக நுவரெலியா, மாத்தளை, பதுளை மற்றும் பொலன்னறுவை ஆகிய மாவட்டங்களின் சில இடங்களில் 50 மி.மீ-க்கும் அதிகமான ஓரளவு பலத்த மழை பெய்யக்கூடும் எனத் தெரிவிக்கப்பட்டுள்ளது.

வட மாகாணத்தில் சில தடவைகள் மழை பெய்யக்கூடும் என எதிர்பார்க்கப்படுகிறது. நாட்டின் ஏனைய பிரதேசங்களில் பிற்பகல் 2.00 மணிக்குப் பின்னர் ஆங்காங்கே மழை அல்லது இடியுடன் கூடிய மழை பெய்யக்கூடும். சில இடங்களில் 50 மி.மீ-க்கும் அதிகமான பலத்த மழை பெய்ய வாய்ப்புள்ளது.

பனிமூட்டமான நிலை:
அதிகாலை வேளையில் நாட்டின் சில பகுதிகளில் பனிமூட்டமான நிலை காணப்படும் என எதிர்பார்க்கப்படுகிறது. குறிப்பாக:

• மேல் மற்றும் சப்ரகமுவ மாகாணங்கள்

• மத்திய மற்றும் வடமேல் மாகாணங்கள்

• காலி மற்றும் மாத்தறை மாவட்டங்கள்

பாதுகாப்பு அறிவுறுத்தல்கள்:
இடியுடன் கூடிய மழை பெய்யும் வேளைகளில் தற்காலிகமாக வீசக்கூடிய பலத்த காற்று மற்றும் மின்னல் தாக்கங்களினால் ஏற்படக்கூடிய பாதிப்புகளைக் குறைத்துக்கொள்ளத் தேவையான முன்னெச்சரிக்கை நடவடிக்கைகளை மேற்கொள்ளுமாறு பொதுமக்கள் அறிவுறுத்தப்படுகின்றனர்.