திருத்தப்பட்ட அறிவித்தல்: பட்டதாரி ஆசிரியர் போட்டிப் பரீட்சை – 2026 (புதிய மாற்றங்கள்)

“இலங்கை ஆசிரியர் சேவையின் தரம் 3-I இற்கு 23,344 பட்டதாரிகளை உள்வாங்குவதற்கான விண்ணப்பக் கோரலில் கல்வி அமைச்சு சில முக்கிய திருத்தங்களை மேற்கொண்டுள்ளது. இதற்கான அதிவிசேட வர்த்தமானி (2476/18) இன்று வெளியாகியுள்ளது. இதில் விண்ணப்ப முடிவுத் திகதி மற்றும் தகைமைகள் தொடர்பான புதிய மாற்றங்கள் அறிவிக்கப்பட்டுள்ளன.” திருத்தப்பட்ட விபரங்கள்,Online Application கீழே தரப்பட்டுள்ளன.

1. தகைமை பூர்த்தி செய்ய வேண்டிய திகதி மாற்றம்:

• முன்னர் தகைமைகள் பூர்த்தி செய்யப்பட வேண்டிய இறுதித் திகதியாக 2025.06.30 குறிப்பிடப்பட்டிருந்தது.

• தற்போதுள்ள புதிய திருத்தத்தின்படி, கல்வி மற்றும் ஏனைய அனைத்துத் தகைமைகளும் 2026.03.05 ஆம் திகதியன்று பூர்த்தி செய்யப்பட்டிருத்தல் வேண்டும்.

2. வயது எல்லை பற்றிய தெளிவுறுத்தல்:

• பதவிக்கு ஆட்சேர்ப்பதற்கான வயதுத் தகைமையானது 2023.02.10 ஆம் திகதியன்று கணக்கிடப்படும்.

3. விசேட பிரிவினருக்கான அனுமதி:

• 2023.02.10 அன்று 40 வயதிற்கு மேற்படாதவர்கள், அந்தத் திகதிக்குப் பின்னரும் 2026.03.05 இற்கு முன்னரும் பட்டத் தகைமையைப் பூர்த்தி செய்திருந்தால் அவர்களும் விண்ணப்பிக்க முடியும்.

• இது குறிப்பாக 2023.02.10 அன்று அரசாங்க சேவையில் இருந்த அல்லது தற்போது முறையான அனுமதியுடன் விலகியுள்ள பட்டதாரிகளுக்குப் பொருந்தும்.

4. மாகாண வதிவிட முன்னுரிமை மற்றும் நிபந்தனைகள்:

• மாகாணப் பாடசாலைகளில் நிலவும் வெற்றிடங்களுக்கு அந்தந்த மாகாணத்தில் நிரந்தர வதிவிடத்தைக் கொண்டவர்களுக்கே முன்னுரிமை அளிக்கப்படும்.

• பிற மாகாணத்தவர்கள் விண்ணப்பித்து நியமனம் பெறும்போது, அந்தந்த மாகாண அரசாங்க சேவை ஆணைக்குழுவினால் விதிக்கப்படும் நிபந்தனைகளுக்குக் கட்டுப்பட வேண்டும்.

5. கிழக்கு மாகாணம் தொடர்பான விசேட குறிப்பு:

• கிழக்கு மாகாணத்தில் நிரந்தர வதிவிடத்தைக் கொண்டிராத விண்ணப்பத்தாரர்கள், பின்வரும் பாடங்களுக்கு மாத்திரமே விண்ணப்பிக்க முடியும்: விஞ்ஞானம், கணிதம், ஆங்கிலம், தகவல் தொழில்நுட்பம் (ICT), தொழில்நுட்ப பாடத்துறை மற்றும் ஆலோசனை (Counseling).

6. ஏனைய ஏற்பாடுகள்:

• 2026.02.02 ஆம் திகதியிடப்பட்ட ஆரம்ப வர்த்தமானி அறிவித்தலில் (2474/19) உள்ள ஏனைய அனைத்து விதிகளும் மாற்றமின்றி நடைமுறையில் இருக்கும்.