அமெரிக்கா மற்றும் இஸ்ரேல் ஆகிய நாடுகள் ஈரானிய நிலப்பரப்பின் மீது நடத்திய பாரிய வான்வழித் தாக்குதல்களைத் தொடர்ந்து, ஈரானின் சர்வதேச இணையத் தொடர்புகள் 99% வரை முடக்கப்பட்டுள்ளதாகத் அதிர்ச்சித் தகவல் வெளியாகியுள்ளது.

கென்டிக் நிறுவனத்தின் அறிக்கை: உலகளாவிய இணையச் செயற்பாடுகளைக் கண்காணிக்கும் ‘கென்டிக்’ (Kentik) நிறுவனத்தின் தரவுகளின்படி, கடந்த சனிக்கிழமை இருதரப்புக்கும் இடையே நிலவிய பதில் தாக்குதல்களுக்குப் பின்னர் ஈரானின் இணைய அணுகலில் சடுதியான வீழ்ச்சி ஏற்பட்டுள்ளது. தற்போதைய நிலவரப்படி, அந்நாட்டின் ஒட்டுமொத்த சர்வதேச இணையத் தொடர்புகளில் சுமார் 99% துண்டிக்கப்பட்டுள்ளதாகக் கணிக்கப்பட்டுள்ளது.

தற்போதைய நிலைவரம்:

• சமூக வலைத்தளங்கள்: ஈரானிய அரசாங்க உயர் அதிகாரிகள் மற்றும் அரச ஆதரவு பெற்ற மிக முக்கிய நபர்களின் கணக்குகள் தவிர ஏனைய அனைத்துப் பொதுப் பயன்பாடுகளும் முடக்கப்பட்டுள்ளன.

• உள்ளூர் கட்டமைப்பு: சர்வதேசத் தொடர்புகள் துண்டிக்கப்பட்ட போதிலும், ஈரானுக்குள் இயங்கும் உள்ளூர் இணையத்தளங்கள் (Intranet) மற்றும் உள்நாட்டுத் தகவல் பரிமாற்றக் கட்டமைப்புகள் தொடர்ந்தும் இயங்கி வருகின்றன.

காரணம் என்ன? போர்ச் சூழலில் நாட்டின் பாதுகாப்புத் தகவல்கள் கசிவதைத் தடுக்கவும், உள்நாட்டில் வதந்திகள் பரவுவதைக் கட்டுப்படுத்தவும் ஈரானிய அரசாங்கம் இந்த அதிரடி நடவடிக்கையை எடுத்துள்ளதாகப் பாதுகாப்பு ஆய்வாளர்கள் கருதுகின்றனர். இதற்கு முன்னர் கடந்த ஜனவரி மாதத்திலும் இதேபோன்ற பதற்றமான சூழலில் ஈரான் இணையத்தைத் துண்டித்திருந்தமை குறிப்பிடத்தக்கது.

மத்திய கிழக்கில் போர் மேகங்கள் சூழ்ந்துள்ள நிலையில், ஈரானின் இந்தத் தகவல் தொடர்பு முடக்கம் சர்வதேச அளவில் பெரும் பரபரப்பை ஏற்படுத்தியுள்ளது.