இந்தியா – பாகிஸ்தான் மோதல் உறுதியானது! கொழும்பில் திட்டமிட்டபடி போட்டி நடைபெற இணக்கம்!

உலகக் கிரிக்கெட் ரசிகர்கள் ஆவலோடு எதிர்பார்த்திருக்கும் 2026 டி20 உலகக் கிண்ணத் தொடரின் இந்தியா – பாகிஸ்தான் அணிகளுக்கு இடையிலான போட்டி, திட்டமிட்டபடி பெப்ரவரி 15 ஆம் திகதி கொழும்பு ஆர். பிரேமதாச மைதானத்தில் நடைபெறவுள்ளதாகத் தகவல்கள் வெளியாகியுள்ளன.

முத்தரப்பு பேச்சுவார்த்தையில் எட்டப்பட்ட இணக்கம்:

லாகூரில் ஞாயிற்றுக்கிழமை நடைபெற்ற ஐசிசி (ICC), பாகிஸ்தான் கிரிக்கெட் சபை (PCB) மற்றும் பங்களாதேஷ் கிரிக்கெட் சபை (BCB) ஆகியவற்றுக்கு இடையிலான நீண்ட முத்தரப்பு பேச்சுவார்த்தையின் பின்னரே இந்த இணக்கப்பாடு எட்டப்பட்டுள்ளது. பாதுகாப்பு காரணங்களால் இந்தியா வர மறுத்த பங்களாதேஷ் அணிக்குத் தடைகள் விதிக்கப்படாது என ஐசிசி உறுதியளித்ததைத் தொடர்ந்து, பாகிஸ்தானும் இந்தியாவுடனான போட்டியில் விளையாடச் சம்மதித்துள்ளதாகத் தெரிகிறது.

ஜனாதிபதி அநுர குமாரவின் இராஜதந்திர தலையீடு:

இலங்கை ஜனாதிபதி அநுர குமார திஸாநாயக்க, பாகிஸ்தான் பிரதமர் முஹம்மது ஷெபாஸ் ஷெரீப்புடன் இன்று (10 பெப்ரவரி 2026) தொலைபேசி ஊடாக விசேட கலந்துரையாடல் ஒன்றை மேற்கொண்டார். இதன்போது, இலங்கையில் பயங்கரவாதம் நிலவிய காலப்பகுதியில் பாகிஸ்தான் வழங்கிய ஆதரவை ஜனாதிபதி நன்றியுடன் நினைவு கூர்ந்தார். அதேபோல், பாகிஸ்தான் கிரிக்கெட் ரசிகர்கள் நலன் கருதி அண்மையில் இலங்கை அணி மேற்கொண்ட பாகிஸ்தான் சுற்றுப்பயணத்தை அந்நாட்டுப் பிரதமர் வரவேற்றார்.

இலங்கையுடனான நீண்டகால நட்புறவைக் கருத்திற்கொண்டு, கொழும்பில் நடைபெறவுள்ள இந்தப் போட்டியில் விளையாடுமாறு ஜனாதிபதி விடுத்த கோரிக்கையைப் பாகிஸ்தான் பிரதமர் சாதகமாகப் பரிசீலித்துள்ளார்.

உத்தியோகபூர்வ அறிவிப்பு விரைவில்:

போட்டியைப் புறக்கணிப்பதாகப் பாகிஸ்தான் அரசு முன்னர் அறிவித்திருந்த போதிலும், தற்போதைய இராஜதந்திர நகர்வுகளின் அடிப்படையில் போட்டி நடைபெறுவது கிட்டத்தட்ட உறுதியாகியுள்ளது. இது குறித்த இறுதித் தீர்மானம் மற்றும் உத்தியோகபூர்வ அறிவிப்பை பாகிஸ்தான் பிரதமர் அலுவலகம் மற்றும் ஐசிசி ஆகியன மிக விரைவில் வெளியிடும் என எதிர்பார்க்கப்படுகிறது.

பெப்ரவரி 15 ஆம் திகதி நடைபெறவுள்ள இந்தப் போட்டி, 2026 உலகக் கிண்ணத் தொடரின் மிக முக்கியமான ஆட்டமாகக் கருதப்படுகின்றமை குறிப்பிடத்தக்கது.