மத்திய கிழக்கில் நிலவும் தீவிர போர்ச் சூழல் காரணமாக உலகளாவிய விமானப் போக்குவரத்துப் பாதிக்கப்பட்டுள்ள நிலையில், இலங்கையிலுள்ள அமெரிக்கப் பிரஜைகளுக்காக கொழும்பிலுள்ள அமெரிக்கத் தூதரகம் விசேட அறிவித்தல் ஒன்றை விடுத்துள்ளது.

விமானப் போக்குவரத்து நிலவரம்: கட்டுநாயக்க சர்வதேச விமான நிலையத்தின் நடவடிக்கைகள் வழமை போன்று முன்னெடுக்கப்பட்ட போதிலும், மத்திய கிழக்கு வான்பரப்பு மூடப்பட்டுள்ளதால் பல விமான சேவைகள் இன்னும் பாதிக்கப்பட்டுள்ளன. எனினும், மத்திய கிழக்கு ஊடாகச் செல்லாத மாற்று விமான சேவைகளைப் பயன்படுத்த முடியும் எனத் தூதரகம் சுட்டிக்காட்டியுள்ளது. பயணிகள் தமது விமான நிறுவனங்களுடன் நேரடியாகத் தொடர்புகொண்டு மேலதிக விபரங்களைப் பெற்றுக்கொள்ளுமாறு அறிவுறுத்தப்பட்டுள்ளனர்.

14 நாட்கள் இலவச விசா நீடிப்பு: விமானப் போக்குவரத்துத் தடையால் இலங்கையிலிருந்து வெளியேற முடியாமல் தவிக்கும் சுற்றுலாப் பயணிகளுக்கு உதவும் வகையில், இலங்கை அரசாங்கம் 14 நாட்களுக்கு இலவச விசா நீடிப்பை (Free Visa Extension) வழங்க நடவடிக்கை எடுத்துள்ளதாகத் தூதரகம் உறுதிப்படுத்தியுள்ளது.

உதவிக்கான அவசர அழைப்பு இலக்கங்கள்: அமெரிக்கப் பிரஜைகளுக்கு ஏதேனும் அவசர உதவி தேவைப்படின் பின்வரும் வழிகளில் தொடர்புகொள்ளலாம்:

• அமெரிக்கத் தூதரக சேவைப் பிரிவு: +94 11 202 8500 (திங்கள் – வியாழன்: பிற்பகல் 1:00 முதல் 2:00 வரை).

• விமானப் பயணம் தவிர்ந்த ஏனைய உதவிகள்: இலங்கை சுற்றுலாத்துறையின் அவசர இலக்கம் 1912.

பாதுகாப்பு தொடர்பான அண்மைக்கால தகவல்களை உடனுக்குடன் தெரிந்துகொள்ளத் தூதரகத்தின் உத்தியோகபூர்வ இணையத்தளம் மற்றும் சமூக ஊடகக் கணக்குகளைத் தொடர்ந்து அவதானிக்குமாறு அமெரிக்கப் பிரஜைகள் கேட்டுக்கொள்ளப்பட்டுள்ளனர்.