மியான்மரின் எல்லைப் பகுதியில் ஆயிரக்கணக்கானவர்களைக் கடத்திச் சென்று, அவர்களை அடிமைகளாக வைத்து இணைய மோசடிகளில் (Cyber Scams) ஈடுபடுத்தி வந்த பிரபல மாஃபியா குடும்பத்தைச் சேர்ந்த 11 உறுப்பினர்களுக்குச் சீன அரசாங்கம் இன்று (29 ஜனவரி 2026) மரண தண்டனை நிறைவேற்றியுள்ளது.
குற்றச்சாட்டுகளின் பின்னணி:
மியான்மரின் ஷான் மாநிலத்தில் உள்ள கோகாங் பிராந்தியத்தை மையமாகக் கொண்டு இந்த மோசடி சாம்ராஜ்யம் இயங்கி வந்தது. அங்கு மிகச் செல்வாக்குமிக்க “மிங்” (Ming Family) மாஃபியா கும்பலாகச் செயல்பட்ட இந்தக் குடும்பம், சீன குடிமக்களைக் குறிவைத்துத் தொலைபேசி மற்றும் இணையம் ஊடாகப் பல கோடி ரூபாய் மோசடிகளைச் செய்துள்ளதாகக் குற்றம் சுமத்தப்பட்டது.
இவர்கள் மீது சுமத்தப்பட்ட முக்கிய குற்றச்சாட்டுகள்:
- இணைய மற்றும் தொலைபேசி மோசடி: சுமார் 10 பில்லியன் யுவான் (1.4 பில்லியன் அமெரிக்க டொலர்) அளவிலான நிதி மோசடி.
- கொலை மற்றும் சித்திரவதை: இவர்களின் மோசடி மையங்களில் பணியாற்றிய 14 சீனக் குடிமக்களைக் கொலை செய்தமை மற்றும் பலரைக் காயப்படுத்தியமை.
- சட்டவிரோதக் கடத்தல்: மக்களைக் கடத்திச் சென்று சட்டவிரோதத் தடுப்புக்காவலில் வைத்து கட்டாய வேலை வாங்கியமை.
நீதிமன்றத் தீர்ப்பு:
கடந்த 2025 செப்டம்பர் மாதம் சீனாவின் வෙන්ஜோ (Wenzhou) நீதிமன்றத்தினால் இவர்களுக்கு மரண தண்டனை விதிக்கப்பட்டது. இதனை எதிர்த்துத் தாக்கல் செய்யப்பட்ட மேன்முறையீடு கடந்த நவம்பர் மாதம் தள்ளுபடி செய்யப்பட்ட நிலையில், சீனாவின் உச்ச மக்கள் நீதிமன்றத்தின் அங்கீகாரத்துடன் இன்று இந்தத் தண்டனை நிறைவேற்றப்பட்டுள்ளது.
மியான்மர் – சீனா ஒத்துழைப்பு:
கடந்த 2023 ஆம் ஆண்டு முதல் எல்லை தாண்டிய குற்றங்களைக் கட்டுப்படுத்தச் சீனா மியான்மர் மீது கொடுத்த கடும் அழுத்தத்தைத் தொடர்ந்து, இந்தக் கும்பலின் தலைவர்கள் மியான்மர் அதிகாரிகளால் கைது செய்யப்பட்டுச் சீனாவிடம் ஒப்படைக்கப்பட்டனர். வெளிநாடுகளில் இருந்து கொண்டு சீனக் குடிமக்களை ஏமாற்றும் மோசடி கும்பல்களுக்கு எதிராகச் சீனா எடுத்துள்ள மிகக் கடுமையான நடவடிக்கையாக இது பார்க்கப்படுகிறது.
தண்டனை நிறைவேற்றப்படுவதற்கு முன்னர், குற்றவாளிகள் தங்களது நெருங்கிய உறவினர்களைச் சந்திக்க அனுமதிக்கப்பட்டதாக அந்நாட்டுச் செய்திகள் தெரிவிக்கின்றன.